विश्व (युनिभर्स) अनन्त नभई यसको आरम्भ भएको थियो भन्नाका लागि विभिन्न मजबुत वैज्ञानिक साक्षीहरू छन् जसमध्ये एउटा होः सीएमबी नाम गरेको विकिरण । सीएमबीको पूरा अर्थ हुन्छ— कस्मिक माइक्रोवेभ ब्याकग्राउन्ड । यो महाविस्फोटमा विश्वको थालनी भएपछि बाँकी रहेको विद्युत चुम्बकीय विकिरण हो ।
ख्रिस्टाब्द १९६५ मा यस विकिरणलाई सन्जोगवश पत्ता लगाइयो । अर्नो पेन्जिस र रोबर्ट विलसन नाम गरेका वैज्ञानिकद्वयले यो खोज पत्ता लगाएका थिए । न्यु जेरेसीस्थित हल्मडेलको बेल ल्याब्स्मा राखिएको तिनीहरूको एन्टिनामा तिनीहरूले अनौठो खालको विकिरण पत्ता लगाए । सुरुमा तिनीहरूले सोचे कि एन्टिनामा चराहरूले गुँड लगाएकाले ती चराका विष्टाका कारणले यस्तो भएको थियो । तर ती गुँड र विष्टालाई हटाउँदा पनि चारैतिरबाट विकिरण आइरहेका तिनीहरूले देखे ।
गत शताब्दीमा भएको यो एउटा यस्तो विस्मयकारी खोज थियो जसले यी वैज्ञानिकद्वयलाई भौतिकशास्त्रमा नोबेल पुरस्कार दिलायो । वास्तवमा यी वैज्ञानिकद्वयले महाविस्फोटबाट फैलिरहेको विकिरणलाई पत्ता लगाएका थिए ।
महाविस्फोट वास्तवमै घटेको थियो भने यो खालको विकिरण हुनैपर्छ भनी १९४८ मा नै तीन जना वैज्ञानिकले भविष्यवाणी गरेका थिए । तर पेन्जिस र विलसनभन्दा अगाडि कसैले पनि त्यो पत्ता लगाउने आँट गरेन । यो खोजको पुष्टि भएपछि यो सारा विश्व अनन्त छ भन्ने आँट प्रायः गरिएको छैन । खगोलविद् रोबर्ट ज्यास्ट्रोले यसरी लेखे, “यो विकिरणको व्याख्याको लागि महाविस्फोटभन्दा अन्य कुनै व्याख्या छैन । … स्थिरावस्थाको सिद्धान्तका समर्थकहरूले वैकल्पिक व्याख्या खोज्ने दुस्साहस गरेका छन्, तर तिनीहरू सफल भएका छैनन् । वर्तमान समयमा महाविस्फोट सिद्धान्तको कुनै प्रतिद्वन्द्वी छैन ।”
बाइबलसित यस खोजको के सम्बन्ध छ त ? यो सारा विश्व अनन्त नभई यसको थालनी भएको थियो भनी बाइबलले प्रस्टसँग सिकाउँछ । बाइबलको पहिलो पुस्तकको पहिलो अध्यायको पहिलो पदमा नै लेखिएको छ, “आदिमा परमेश्वरले आकाशमण्डल र पृथ्वी सृष्टि गर्नुभयो” (उत्पत्ति १:१) । बिसौँ शताब्दीको यो विस्मयकारी वैज्ञानिक खोज विश्व अनन्त नभई यसको आरम्भ भएको छ भन्ने बाइबलीय शिक्षासित सोर्है आना मेल खान्छ ।
