पुस्तकको नाम : संसार बदल्ने १०१ ओटा वैज्ञानिक खोज (भाग १)
लेखक/सम्पादक : कमल अधिकारी
पृष्ठ सङ्ख्या : १५९
मूल्य रु. : २२०
प्रकाशक : सामदान प्रकाशन
प्रकाशन साल : २०२३
ISBN : 978-9937-9-6129-5
लेखक कमल अधिकारीको यस बार्हौँ पुस्तकमा तेर्हौँ शताब्दीदेखि एक्काइसौँ शताब्दीसम्मका १०१ ओटा वैज्ञानिक खोज समावेश गरिएका छन् । यी खोजका लागि १०९ जना आविष्कारकले योगदान दिएका छन् । ती योगदानकर्ताहरू विभिन्न धर्मका थिए । ६६% आविष्कारकसहित ख्रिस्टियन पहिलो स्थानमा छ भने १३% आविष्कारकको धर्म अनिश्चित छ । यहुदी ६% छ भने नास्तिक ५% । परमेश्वर अस्तित्वमा हुनुहुन्छ वा हुनुहुन्न भनी निश्चित छैन भन्ने विचारधारा अङ्गाल्ने व्यक्तिलाई अज्ञेयवादी भनिन्छ र यी खोजमा अज्ञेयवादीहरूको ४% योगदान रहेको छ । परमेश्वरले सम्पूर्ण विश्वको सृष्टि गर्नुभयो तर यसमा उहाँको कुनै हस्तक्षेप हुँदैन भन्ने विचारधारा अङ्गाल्ने व्यक्तिलाई देववादी (डिइस्ट) भनिन्छ र देववादीहरूको ४% योगदान रहेको छ । बौद्धमार्गी र मुस्लिमको १/१ प्रतिशत योगदान देख्न सक्नुहुन्छ ।
१४४० तिर छापाखानाको आविष्कार गर्ने वैज्ञानिक योहान्नेस गुटेनबर्ग मात्र ख्रिस्टियन थिएनन् तर १५२० मा सूर्य केन्द्रित सिद्धान्त पत्ता लगाउने वैज्ञानिक निकोलस कोपर्निकस पनि ख्रिस्टियन नै थिए । १५८० मा जलचक्रको आविष्कार गर्ने खोजकर्ता बर्नार्ड पालिसी मात्र येशूका अनुयायी थिएनन् तर १६०९ मा ग्रहहरूको चाल पत्ता लगाउने जोहानेस केप्लर पनि येशूका चेला थिए । टेलिस्कोपका आविष्कारक ग्यालिलियो ग्यालिली, रक्तसञ्चार प्रणालीका आविष्कारक विलियम हार्बे, कोषका आविष्कारक रोबर्ट हुक, गुरुत्वाकर्षणका आविष्कारक सर आइज्याक न्युटन जस्ता इतिहासमा आफ्ना नाम अमर राख्ने वैज्ञानिकहरू सबै नै ख्रिस्टियन थिए ।
१७७४ मा अक्सिजन पत्ता लगाउने वैज्ञानिक जोसेफ प्रिस्टली, १७८३ मा प्यारासुटको आविष्कार गर्ने लुइस सेबास्टियन, १७९६ मा बिफरको खोप पत्ता लगाउने वैज्ञानिक एडवार्ड जेनर र १८०० मा ब्याट्रीका आविष्कार गरेका अलेस्यान्ड्रो भोल्टा सबै नै प्रभु येशूका अनुयायी थिए ।
यसका अतिरिक्त, क्यामरा, स्टेथिस्कोप, कम्प्युटर, जेनरेटर, साइकल, टाइपराइटर, एअर ब्रेक, मोटरसाइकल, एक्सरे, रेडियो, इसिजी, डिजेल इन्जिल, रगतको किसिम, एसी, विमान, इन्सुलिन जस्ता खोजहरू पत्ता लगाई संसारलाई सभ्यताको यस उचाइसम्म पुर्याउन योगदान दिनेहरू सबै नै ख्रिस्टियन थिए ।
पुस्तकमा कुन खोज कहिले, कसले र कहाँ पत्ता लगाइएको थियो भनेर प्रस्ट पारिएको छ । यी खोजको परिणामस्वरूप मानव सभ्यता यहाँसम्म आइपुग्न सफल भएको हो र हरेक देशको हरेक समाज यी खोजहरूबाट लाभान्वित भएको छ ।
बाइबलअनुसार परमेश्वरले यो सम्पूर्ण विश्व सृष्टि गर्नुभयो । विशेष प्रकाश र सामान्य प्रकाश दुईवटा तरिकाले उहाँलाई जान्न सकिन्छ । विशेष प्रकाश भनेको बाइबल हो भने सामान्य प्रकाश भनेको प्रकृति हो । प्राकृतिक ईश्वरशास्त्रमा प्रकृतिको अवलोकनको आधारमा परमेश्वरको बारेमा अध्ययन गरिन्छ । यस पुस्तकमा प्रकृति अर्थात् सामान्य प्रकाशको बारेमा अध्ययन गरिएको छ ।
दाउदका अनुसार प्रकृतिले परमेश्वरको महिमाको घोषणा गर्छ, “आकाशले परमेश्वरका महिमाको वणर्न गर्छ र तारामण्डलले उहाँका हातको सिपको घोषणा गर्छ” (भजन १९:१) । पावलले बताएका छन् कि प्रकृतिको अध्ययनबाट परमेश्वरका अदृश्य गुणहरू थाहा पाउन सकिन्छ, “किनकि उहाँको अदृश्य गुण अर्थात् उहाँको अनन्त शक्ति र ईश्वरीय स्वभाव संसारको सृष्टिदेखि नै बनाइएका थोकहरूमा छर्लङ्ङै देखिएको छ” (रोमी १:२०) ।
