एउटा मात्र खुट्टा भएको अशक्त व्यक्ति भएर पनि तिनी किन मिसनरी भएर चीन जान लागेका थिए भनी सोधिँदा तिनले यसरी उत्तर दिएका थिए, “दुईवटा खुट्टा भएकाहरू गएका मैले देखिनँ । तसर्थ, म जानैपर्छ ।” यसरी जवाफ दिने व्यक्ति थिए, जर्ज स्टट ।
बुबा जोन स्टट र आमा जेन एन्डरसनबाट १३ अप्रिल १८३५ मा स्कटल्यान्डमा जन्मेका स्टट हाम्रो छिमेकी मुलुक चीनको झेजियाङ्ग प्रान्तको वेन्जु सहरमा जाने प्रथम ख्रीष्टियान मिसनरी हुन् ।
१९ वर्षको उमेरमा लडेर खुट्टा सुन्निएकोले पछि स्टटले देब्रे खुट्टा नै गुमाउनुपर्यो । आफ्नो एउटा खुट्टा गुमेपछि सुरुमा स्टट स्कुलका शिक्षक बने । स्टटले कसरी आफ्नो एउटा गुमाउन पुगे भन्ने बारेमा तिनकी पत्नी ग्रेस किगीले लेखेकी छन्, “स्टट कृषिको काममा हुर्काइएका थिए, तर करिब १९ वर्षको पुग्दा तिनी बाटोमा चिप्ले र ढुङ्गामा तिनको घुँडा ठोकियो । यो सामान्य दुर्घटनाको परिणामस्वरूप तिनको खुट्टा सुनियो र दुई वर्षपछि देब्रे खुट्टा काट्नुपर्यो । नौ महिनासम्म तिनी सहाराविहीन अशक्त थिए, र यही समयावधिमा परमेश्वरले आफ्नो अनुग्रहमा तिनको आत्मा बचाउनुभयो ।” पत्नीका अनुसार त्यस बेलासम्म स्टटले लापर्वाह जीवन बिताएका थिए र तिनी “ख्रीष्ट येशूमा प्राप्त परमेश्वरको प्रेमप्रति तटस्थ थिए, तर अहिले तिनको सहाराविहीन अवस्थामा तिनको भविष्य नै धरापमा परेको जस्तो देखिँदा त्यही प्रेम कति अनमोल भयो!”
चाइना इनल्यान्ड मिसन नामक अन्तर-साम्प्रदायिक संस्थाको लागि हडसन टेलरले मिसनरीहरूको खोजी गर्दै थिए भनी जानकारी पाएपछि स्टटले पनि योगदान दिन चाहे । अपाङ्ग हुँदाहुँदै पनि कृत्रिम खुट्टा हालेर तिनी ४ अक्टोबर १८६५ मा मिसनरी भएर चीनतर्फ लागे र लगभग चार महिनापछि अर्थात् ६ फेब्रुअरी १८६६ मा चीनको साङ्घाईमा आइपुगे र तिनले तुरुन्तै त्यहाँको भाषा सिक्न थाले । त्यसको दुई वर्षपछि तिनकी पत्नी ग्रेस पनि आइपुगिन् र उनले झन्डै ३८ वर्षसम्म मण्डलीमा योगदान पुर्याइन् । शारीरिक अशक्तताको बाबजुत पनि जर्ज एक प्रभावशाली मिसन अगुवाको रूपमा खडा भए ।
मिसनरी हडसन टेलरद्वारा स्थापित चाइना इनल्यान्ड मिसनलाई हाल ओएमएफ इन्टरनेसनल भनेर चिनिन्छ । ख्रिस्टाब्द १८६५ मा स्थापित यस संस्थाले ८०० भन्दा बेसी मिसनरीलाई चीनमा झित्र्याउन महत्त्वपूर्ण भूमिका निभाको छ र यस संस्थामार्फत हजारौँ मानिसले आफ्नो जीवन प्रभु येशूमा सुम्पेका छन् ।
स्टटलाई मिसनको कामको लागि स्वीकार गरेर हडसन टेलरले विश्वासको प्रदर्शनी गरेका थिए किनकि कुनै पनि संस्थाले खुट्टा नभएको मान्छेलाई त्यस्तो देशमा पथ-प्रदर्शकको रूपमा पठाउँदैनथ्यो । आफूलाई स्वीकार गरेकोमा स्टट अक्सर टेलरप्रति आभारी भए ।
स्टटले सेवा गरेका वेन्जु सहरमा स्थापित झेङ्ग्सी क्रिस्चियन चर्च त्यहाँको प्राचीनतम चर्च हो जुन अहिलेसम्म पनि तिनको सेवाको साक्षीको रूपमा खडा छ । आज वेन्जु सहरलाई “चीनको यरूशलेम” भनेर चिनिन्छ किनकि पूरै वेन्जु नगरपालिकामा भएका ६० लाख जनसङ्ख्यामध्ये त्यहाँ १०% अर्थात् ६ लाख इभान्जलिकल ख्रीष्टियान छन् ।
अपाङ्ग भएर स्टटले चीनमा २२ वर्षभन्दा बेसी समय बिताए र ५४ वर्षको उमेरमा २१ अप्रिल १८८९ मा इस्टरको बिहान तिनी आफ्नो स्थायी घरमा प्रवेश गरे ।
