२४ डिसेम्बर १९६८ मा एउटा गजबको इतिहास रचिएको थियो । त्यस दिन चन्द्रमालाई फन्को मार्ने क्रममा नासाका तीन जना अन्तरिक्ष यात्रीले अन्तरिक्षमा नै पालैपालो बाइबलको वचन (उत्पत्ति १:१-१०) पढेका थिए । तिनीहरू अप्पोल्लो ८ नाम दिइएको अन्तरिक्ष यात्रामा थिए । ६ दिन ३ घण्टा ४२ मिनेट अन्तरिक्षमा बिताई अन्तरिक्ष यात्रीत्रय बिल एन्डर्स, जिम लोभेल र फ्र्याङ्क बोरम्यान सकुशल पृथ्वीमा फर्के । पृथ्वीको कक्षलाई छाड्ने, पृथ्वीको एक मात्र उपग्रह चन्द्रमामा पुग्ने अनि यसलाई फन्को मारी सकुशल पृथ्वीको धरातलमा फर्कनमा तिनीहरूले इतिहास रचेका थिए ।
त्यो दिन ख्रिस्टमस सन्ध्या थियो । तीन जना सदस्यले चन्द्रमालाई फन्को मार्दै थिए । प्रत्यक्ष प्रसारण गरिएको त्यस दृश्यले संसारको ध्यान खिँचेको थियो । त्यस बेला यो टेलिभिजनमार्फत सबैभन्दा बेसी दर्शकद्वारा प्रत्यक्ष हेरिएको दृश्य थियो । अन्तरिक्ष यात्रीहरूले आआफ्नो परिचय दिएपछि एक जनाले भने, “अब हामी चन्द्रोदयतर्फ नजिकिँदै छौँ र पृथ्वीमा भएका सबै मानिसका लागि अपोल्लो ८ का सदस्यहरूसित तपार्इंहरूलाई पठाउने एउटा सन्देश छ ।”
त्यसपछि तीन जना अन्तरिक्ष यात्रीले उत्पत्ति १ अध्यायका अगिल्ला १० ओटा पदलाई पालैपालो पढे । सुरुमा बिल एन्डर्सले पदहरू १-४ सम्मका वचनहरू पढे, “आदिमा परमेश्वरले आकाश र पृथ्वी सृष्टि गर्नुभयो । पृथ्वी आकारविनाको र शून्य थियो । अथाह समुद्रमाथि अन्धकार थियो, र परमेश्वरका आत्मा पानीमाथि परिभ्रमण गर्दैरहनुहुन्थ्यो । अनि परमेश्वरले भन्नुभयो, ‘उज्यालो होस् ।’ तब उज्यालो भयो । अनि परमेश्वरले उज्यालोलाई हेर्नुभयो, त्यो असल थियो । उहाँले उज्यालो र अँध्यारोलाई अलग-अलग गर्नुभयो ।”
तिनलाई पछ्याउँदै जिम लोभेलले ५-८ सम्मका वचनहरू पढे, “परमेश्वरले उज्यालोलाई ‘दिन’ र अँध्यारोलाई ‘रात’ भन्नुभयो । साँझ पर्यो र बिहान भयो— पहिलो दिन । अनि परमेश्वरले भन्नुभयो, ‘पानीका बीचमा एक क्षेत्र होस्, र त्यसले पानीलाई दुई भाग गरोस् ।’ परमेश्वरले सो बनाएर क्षेत्रमुनिको र माथिको पानीलाई अलग-अलग गर्नुभयो । तब त्यस्तै भइहाल्यो । परमेश्वरले यस अन्तरिक्षलाई आकाश भन्नुभयो । साँझ पर्यो र बिहान भयो— दोस्रो दिन ।” अन्त्यमा फ्र्याङ्क बोरम्यानले ९ र १० का वचनहरू पढी यसो भनेर टुङ्ग्याए, “अपोल्लो ८ का सदस्यहरूबाट हामी शुभरात्री, सौभाग्य, मेरी ख्रिस्टमस अनि सुन्दर पृथ्वीमा हुनुभएका तपाईंहरू सबैलाई परमेश्वरले आशिष् दिनुभएको होस् भनी टुङ्ग्याउँछौँ ।”
