अमेरिकाको नोटमा लेखिएको छ, “In God We Trust.” यसको नेपाली अनुवाद यस्तो हुन्छ, “परमेश्वरमा नै हामी भरोसा गर्छौं ।” यो अमेरिकाको औपचारिक नारा पनि हो । अमेरिकाले १९५६ देखि यस नारालाई अप्नाएको थियो । अमेरिकी गृहयुद्धको बेलामा रचना गरिएको यो नारा १८६४ मा पहिलो पटक अमेरिकी सिक्कामा देखा परेको थियो । नोटमा भने यसलाई पहिलो पटक १९५७ मा प्रयोग गरिएको थियो ।
केही समूहहरूसाथै मानिसहरूले मुद्रामा व्यक्त यस्तो अभिव्यक्तप्रति आपत्ति जनाए । मुद्रासाथै सार्वजनिक सम्पत्तिबाट यसलाई हटाइएको हुनुपर्छ भन्ने तिनीहरूको माग रहेको छ । तर २००३ को एउटा सर्वेक्षणअनुसार ९०% अमेरिकीहरू मुद्रामा यो अभिव्यक्ति हुनुपर्छ भन्ने पक्षमा देखिएका थिए ।
भजनसंग्रह ११८:८ मा लेखिएको छ, “परमप्रभुको शरण लिनु मानिसहरूमाथि निर्भर गर्नुभन्दा उत्तम हुन्छ ।” त्यस्तै राजा दाऊदले लेखेका छन्, “उहाँले मेरा ओठमा एउटा नयाँ गीत राखिदिनुभयो, हाम्रा परमेश्वरका प्रशंसाको एउटा गीत । धेरैले यो देख्नेछन् र डराउनेछन्, र परमप्रभुमा भरोसा राख्नेछन्” (भजनसंग्रह ४०:३) । आसापद्वारा लिखित अर्को भजनमा व्यक्त गरिएको छ, “तर मेरो लागि भने परमेश्वर नजीक रहनु असल छ । मैले परमप्रभु परमेश्वरलाई मेरो शरणस्थान बनाएको छु, म तपार्इं सबै कार्यहरूको वर्णन गर्नेछु” (भजनसंग्रह ७३:२८) । दार्शनिक सोलोमनले लेखे, “मान्छेको डर एउटा पासोजस्तो हो, तर परमप्रभुमा भरोसा राख्ने मानिस सुरक्षित रहन्छ” (हितोपदेश २९:२५) ।
ख्रीष्टियान सिद्धान्तहरूमा नै अमेरिका स्थापित भएको थियो भनी यस देशको इतिहासले बारम्बार देखाउँछ । भवन, औपचारिक कागजातसाथै ऐतिहासिक भाषणहरूमा यो सत्यतालाई देख्न पाइन्थ्यो । अमेरिका एउटा स्वतन्त्र राज्य हो जहाँ धार्मिक स्वतन्त्रता कायमै छ । हिन्दु विद्वान् मेलकोट रामास्वामीले व्यक्त गरेका छन्, कि अमेरिकी मुद्रामा लिखित यो अभिव्यक्ति “परमेश्वर जताततै हुनुहुन्छ, चाहे हामी त्यसबारे सचेत हौऔँ वा नहोऔँ” भनी सम्झना दिलाउने अवयव हो । अमेरिकाका तृतीय राष्ट्रपति थोमस जेफरसनले लेखे, “हामीलाई जीवन दिनुहुने परमेश्वरले नै हामीलाई उही समयमा स्वतन्त्रता दिनुभयो ।” तिनले प्रश्न गरे, “स्वतन्त्रता परमेश्वरकै हो भन्ने निश्चयतालाई हटाउँदा के राज्यको स्वतन्त्रता सुरक्षित हुन सक्छ र ?”
