ख्रिस्टाब्द १८१७ मा अमेरिकामा स्थापित हार्वड ल स्कुलमा कानुनका एक जना बौद्धिक प्राध्यापकले पढाउँदै थिए । पढाउने क्रममा तिनले आफ्ना विद्यार्थीहरूलाई भन्दै थिए कि येशूको पुनरुत्थान केवल मिथ्या हो । तिनी नास्तिक भएकाले तिनले आश्चर्यकर्ममाथि विश्वास गर्दैनथ्ये । तर तिनका तीन जना विद्यार्थीले तिनको भनाइको खण्डन गर्दै साक्षीबारे तिनका प्रशंसित नियमहरूलाई येशूको पुनरुत्थानमा लागु गर्न चुनौती दिए ।
त्यसबारे निकै मनन गरेपछि तिनले चुनौतीलाई आत्मसात् गरे र तिनी अनुसन्धानको लागि अगाडि बढे । इतिहासको सत्यताको विषयमा आफूसित भएका उत्कृष्ट समझको प्रयोग गरी येशूको पुनरुत्थानको विवरण झुटो हो भनी प्रमाणित गर्ने कोसिस गरे तिनले ।
तर तिनले ऐतिहासिक अभिलेखलाई जति धेरै अनुसन्धान गरे येशू वास्तवमै चिहानबाट फेरि उठ्नुभएको थियो भन्ने मजबुत साक्षी देखेर तिनी त्यति नै धेरै चकित परे । मानवीय इतिहासको मार्गलाई नै बद्ल्ने घटनाले तिनको सन्देहवादलाई चुनौती दिँदै थियो ।
येशूको मृत्युपछि देखा परेका नाटकीय परिवर्तनहरूलाई व्याख्या गर्न तिनी असक्षम भएका थिए । चेलाहरूको व्यवहारमा आएको परिवर्तनले तिनलाई छक्क पारेको थियो । एक वा दुई जनाले मात्र नभई सबै चेलाले येशू पुनरुत्थान हुनुभएको थियो भनी दाबी गर्दै थिए । सत्यताको निम्ति साक्षीका आफ्नै नियमहरूलाई प्रयोग गरी तिनी निर्णयमा पुगे— क्रुसारोहणपश्चात् देखा परेको दृश्यको लागि उहाँको पुनरुत्थान नै सबैभन्दा उत्कृष्ट व्याख्या हो ।
तिनी आफूले बटुलेका साक्षीहरूबाट यति विश्वस्त बने कि तिनले आफ्नो जीवन येशूमा सुम्पे । आफूले जम्मा पारेका सामग्रीहरूबाट तिनले येशूको पुनरुत्थानको पक्षमा एउटा गतिलो पुस्तक लेखे: द टेस्टिमुनी अफ द इभान्जलिस्ट्स । यस पुस्तकको अन्त्यमा तिनले येशूको पुनरुत्थानबारे भएको सत्यतालाई खोजी गर्नेहरूलाई निष्पक्ष रूपमा त्यसको जाँच गर्न चुनौती दिएका छन् । तिनी विश्वास गर्छन् कि पूर्वाग्रही नभईकन उपलब्ध साक्षीलाई इमानदारीपूर्वक जाँच गर्ने व्यक्ति उही निष्कर्षमा पुग्छ जुन निष्कर्षमा तिनी पुगेका थिए— येशूले वास्तवमै मृत्युमाथि विजय हासिल गर्नुभयो ।
१७८३ मा अमेरिकामा जन्मेका ती प्राध्यापकको नाउँ हो, सिमोन ग्रिनलिफ । अ ट्रिटिज अन द ल अफ एभिडेन्स नामक तिनका तीन ठेलीको कानुनसम्बन्धी सर्वोत्कृष्ट कृतिको रचनाका अतिरिक्त तिनका अन्य पुस्तकहरू पनि छापिएका छन् । तिनी ख्रीष्टियान विश्वासको पक्षमा बौद्धिक रूपमा वकालत गर्ने ख्रीष्टियान पक्षमण्डनशास्त्री बने ।
