“हाम्रा परमेश्वर शक्तिशाली किल्ला हुनुहुन्छ” नामक भजन सर्वोत्कृष्ट भजनहरूको सूचीमा पर्छ । ख्रिस्टाब्द १५२९ तिर सुधारवादी मार्टिन लुथरद्वारा रचित यस भजनलाई “सुधारवादको राष्ट्रिय गान” भनिएको छ । यस भजनलाई अङ्ग्रेजी भाषामा मात्रै कम्तीमा पनि ७१ पटक अनुवाद गरिएको छ । ख्रीष्टियान जगत्मा गाइने अन्य कुनै पनि भजनभन्दा यस भजनलाई सबैभन्दा बेसी भाषामा अनुवाद गरिएको छ । संसारका विभिन्न मण्डलीहरूमा आज पनि लाखौँ मानिसले यसलाई गाउँछन् । भजनसङ्ग्रह ४६ का वचनहरूको आधारमा रचना गरिएको यस भजनले परमेश्वरको सार्वभौम शक्तिको जयजयकार गर्दछ । उहाँको शक्ति सारा पृथ्वी र संसारका सबै शक्तिभन्दा माथि छ भनी यसले उहाँको तारिफ गर्दछ । यसको प्रकाशनपश्चात् सारा युरोपभरि यसको लोकप्रियता ह्वात्तै बढेको थियो ।
लुथर ईश्वरशास्त्री, प्राध्यापकसाथै लेखक थिए । प्रोटस्टेन्ट अभियानमा तिनी प्रारम्भिक सुधारवादी थिए । लुथरको प्रभाव ईश्वरशास्त्र र मण्डलीका गतिविधिभन्दा परसम्म पुगेको थियो । सङ्गीत मन पराउने लुथरले रचना गरेका भजनहरूमध्ये यो एउटा प्रसिद्ध भजन हो । तिनले जर्मन भाषामा बाइबल अनुवाद गरे; साहित्य र शिक्षालाई प्रोत्साहन दिए । निस्सन्देह, लुथर मण्डली इतिहास र युरोपको इतिहासमा एक महत्त्वपूर्ण पात्र हुन् ।
कुन परिस्थितिमा यो भजन लेखिएको थियो होला भन्ने सम्बन्धमा विभिन्न परिकल्पनाहरू अगाडि सारिएको भए तापनि एउटा तथ्यचाहिँ प्रस्ट छ कि यस भजनले धेरैलाई प्रेरणा दिनुका साथै यसले मानिसको हृदयलाई सान्त्वना दिएको छ । भजनशास्त्रको शब्दकोशका सम्पादक जोन जुलिएनले यस भजनको उत्पत्तिबारे चारवटा सिद्धान्तलाई अभिलिखित गरेका छन् जसमध्ये एउटा सिद्धान्तले भन्छः लुथर र तिनका मित्रहरू क्याथोलिक सभाको लागि वर्म्स सहरमा प्रवेश गरिरहँदा तिनीहरूले यो भजन गाएका थिए ।
१५३६ मा नै स्विडेनी भाषामा अनूदित यो भजन प्रारम्भिक स्विडेनी समाजवादी अभियानको राष्ट्रिय गान नै बनेको थियो । बाइबल अनुवादकको रूपमा परिचित सुधारवादी माएल्स कभर्डेलले यसलाई १५३९ मा अङ्ग्रेजीमा अनुवाद गरे । क्याथोलिकहरूले यसलाई लामो समयसम्म मन नपराए तापनि आज तिनीहरूका भजन पुस्तकहरूमा पनि यस गीतलाई समावेश गरिएको पाइन्छ । इतिहासकै परिचित सङ्गीतकार जोहान सेबास्टियन बाकलगायत मनग्गे सङ्गीतकारहरूले यस भजनलाई प्रयोग गरेका छन् ।
