- बाइबललाई सुरुमा हिब्रु, आरमेइक र ग्रिक गरी तीनवटा भाषामा लेखिएको थियो । हाल बाइबलको वचन हजारौँ भाषामा उपलब्ध भइसकेको छ । बाइबल अनुवादको कथा निकै ह्रदयस्पर्षी छ किनकि अनुवादको क्रममा कतिले जेल जीवन गुजार्नुपर्यो, कति देश निकाला गरिए भने कतिले ज्यानै गुमाउनुपर्यो ।
- पहिलो पटक अनुवाद गरिएको बाइबललाई तर्गुम भनेर चिनिन्छ । यो चाहिँ आरमेइक भाषामा अनुवाद गरिएको पञ्चग्रन्थ (अर्थात् बाइबलका अगिल्ला पाँचवटा पुस्तक) थियो । ६०५ ख्रिस्टपूर्वमा यहुदीहरू पहिलो पटक बेबिलोनी निर्वासनमा लगिँदा जब आरमेइक तिनीहरूको सम्पर्कको भाषा बन्यो तब त्यस समयमा धेरै यहुदी आफ्नो मातृभाषा अर्थात् हिब्रु नबुझ्ने भइसकेका थिए । सभाघरमा पढ्दा सर्वसाधारणले पनि बुझ्न सकियोस् भन्ने हेतुले वचनलाई आरमेइक भाषामा अनुवाद गर्नु परेको थियो । करिब २५० ख्रिस्टपूर्वमा पुरानो करारको बाइबललाई ग्रिक भाषामा अनुवाद गरियो जसलाई सेप्टुआजिन्ट भनेर चिनिन्छ । यो नै ग्रिक भाषामा अनुवाद गरिएको प्राचीनतम बाइबल हो । नयाँ करारका लेखकहरूले यही बाइबलबाट प्रचुर मात्रामा उधृत गरे ।
- नेपाली भाषामा बाइबल अनुवाद गर्ने प्रथम व्यक्ति चाहिँ विलियम केरी हुन् । तिनले ख्रिस्टाब्द १८२० मा भारतको बङ्गालमा नयाँ करारलाई नेपाली भाषामा उतारेका थिए । ब्रिटिस एन्ड फोरेन बाइबल सोसाइटीको प्रयासमा पादरी गङ्गाप्रसाद प्रधानको मुख्य भूमिकामा पूरै बाइबललाई १९१४ मा नेपाली भाषामा प्रकाशित गरियो । गङ्गाप्रसाको नेपाली बाइबलले नेपाली भाषा बुझ्ने धेरै नेपालीलाई प्रभुमा डोर्याउन मदत गर्यो ।
- हालसम्म पूरै बाइबल ७५६ ओटा भाषामा, नयाँ करार थप १,७२६ र बाइबलका अंशहरू थप १,२७४ ओटा भाषामा अनुवाद भइसकेको छ । यसको अर्थ हुन्छ कि बाइबलको कुनै न कुनै वचन कम्तीमा ३,७५६ ओटा भाषामा अनुवाद भइसकेको छ ।
- कुल भाषामध्ये ५०.८% भाषामा बाइबल अनुवाद भए तापनि बाइबल अनुवाद भएका यी भाषाले संसारको कुल जनसङ्ख्याको ७ अरब २३ करोड जनसङ्ख्याको प्रतिनिधित्व गर्छन् अर्थात् ९८% मानिसका भाषामा बाइबलको वचन उपलब्ध छ ।
- संसारमा जम्माजम्मी ७,३९६ ओटा भाषा बोलिन्छन् । हाल विश्वको कुल जनसङ्ख्या ८ अरब १२ करोड रहेको अनुमान गरिएको छ । पछिल्लो तथ्याङ्कअनुसार ७ अरब ४५ करोड मानिसले संसारका यी ज्ञात ७,३९६ ओटा भाषा बोल्छन् ।
- संसारका १७३ ओटा मुलुकका ३,५२६ ओटा भाषामा बाइबल अनुवाद जारी छ । यस परियोजनाको पूर्णताबाट १ अरब २६ करोड मानिस लाभान्वित हुने छन् । यो भनेको कुल भाषाका प्रयोगकर्तामध्ये १६.९% हुन आउने छ । यस धरतीमा बाइबल अनुवादद्वारा परमेश्वरले अचम्म तरिकाले आफ्नो काम गरिरहनुभएको छ ।
स्रोतहरू :
- https://www.wycliffe.net/resources/statistics/
- कमल अधिकारी, प्राचीन बाइबलका लागि आधुनिक साक्षीहरू
Facebook Comments
